Aron dunay kabilinan sa mga binuhing hayop nga dad-on sa mall, gimugna sa usa ka dakung mall sa Iligan City ang Pet Park.
Usa kini ka lugar kung asa mahimong magdula o mopahulay ang mga binuhing hayop, iro man o iring, kung gikapoy na og suroy-suroy sa pag-shopping ang mga tag-iya o pet owner.
Sumala ni Romeo Perez, Marketing Communications Officer sa Robinsons Place, tumong sa pagmugna sa Pet Park nga mahimo silang pet friendly mall tungod kay ilang na-obserbahan nga daghang mall goers ang magdala sa ilang binuhi tungod kay walay magbantay kung ibilin sa balay.
“Gi-provide nato ni siya for our dear local pet owners to encourage them to have their moment with their fur babies or any kind of pets nga pwde lang nila madala diri sa mall,” pamahayag ni Perez.
Busa, gikalipay sa mall-goer ug fur parent nga si Clark Capangpangan nga namugna ang Pet Park tungod kay nahimo niya, matud pa, nga problema ang pagsulod sa mall kung dala niya iyang duha ka husky.
Dili tanang iro mahimong makasulod sa mall. Pasudlon lang kadtong gagmay nga dunay timbang 25 to 50 pounds ug dili molapas sa 25 inches ang ka-taas. Ang mga kumpleto lang usab sa bakuna ang mahimong pasudlon sa mall.
Apan sa Pet Park, ma-dagko o gagmay, o bisan og dili pa kumpleto sa bakuna ang mga alaga, mahimo silang makadula.
“Mas maayo kung dunay ingon ani nga Pet Park ang atoang mga mall kay usahay moadto ta og mall walay mabilin sa atong balay, naa tay kabilinan sa ilaha, pwde sila ubanon sa mall, magdula-dula sila kay duna namay kadulaan,” pamahayag ni Capangpangan.
Apan bisan paman nga dili requirement sa Pet Park nga kumpleto sa bakuna ang dad-on nga alagang hayop, nag-awhag gihapon si Capangpangan sa mga adunay binuhi nga bakunahan ang ilang mga pets alang sa ilang proteksiyon.
“Ang tendency man gud kung maglaag ta’g dogs or pets diri nga unvaccinated taas ilang case nga makakuha og sakit. Para ra gihapon nah sa ilaha nga dapay fully vaccinated,” matud ni Capangpangan.
Sumala ni Dr. Dahlia Valera, City Veterinarian sa Iligan wala pay ordinansa sa Iligan nagmando sa mga mall o bisan unsa nga establisimento nga magmugna og pet park.
Apan dakung tabang kini, sumala pa, sa mga kostumer nga dunay dalang alagang hayop kung mobisita sa mga mall.
“Mas maayo, i-encourage nato ang mga establishment, nga magbutang sila og ingon ani,” pamahayag ni Valera.*
Via |DIVINA M. SUSON
