Sugbuanong negosyante nga si Peter Lim , nagplano na karon nga modangop sa National Bureau of Investigation sa Central Visayas aron mangayo ug tabang sa pag-imbistigar sa nahitabo nga pag-ulbo sa duha ka iksplosibo sa ilang tindahan nga Hilton Motors Corporation sa Mandaue kagahapon sa kadlawon .
Gibutyag kini sa liason officer ni Lim nga si Dioscoro Fuentes Jr human sila nagkahinabi sa kontrobersiyal nga negosyante.
Matud ni Fuentes , posibling moduaw ang negosyante karon o ugmang adlawa sa NBI-7 aron hangyoon nga moapil ang ahensiya sa pag-imbistigar kung unsay motibo ug kung kinsa ang responsabli sa pagbutang ug iksplosibo sa display center sa mga sakyanan sa ilang establisamento .
Si Lim usa sa mga incorporators sa Hilton Motors nga nahimutang sa M. C. Briones Street Barangay Subangdaku sa dakbayan sa Mandaue .
Wa dinhi sa Sugbu si Lim kundili didto siya sa kaulohan dihang nahitabo ang insidente .
Subay sa maong hitabo gibati na usab ug kabalaka si Lim sa iyang seguridad .
Nagtukod na hinoon ang Mandaue City Police Office ug Special Investigation Task Group –Hilton aron moimbistigar usab sa maong hitabo .
Duha ka sakyanan sa display area ang nakaangkon ug kadaut sa iksplosibo nga gibana-banang nidanyos ug P26,000 sa kinatibuk-an .
Ang kontrobersiyal nga negosyante gilambigit ni Presidente Rodrigo Duterte sa ilegal nga drugas.
