PGB aduna nay full pledged Provincial Health Officer

28

GIKUMPIRMA na sa Sangguniang Panlalawigan sa Bukidnon si Dr. Gary Guido C. Tabios, Jr. isip full pledged Provincial Health Officer sa Provincial Health Office (PHO), epektibo February 16, 2021.

Gumikan kay anaa man sa dinalian nga sitwasyon, gihangyo ni Provincial Governor Jose Ma. R. Zubiri, Jr., ang SP nga gilayong aksyunan ang iyang sulat hangyo pinitsahan February 16, 2021.


Miagi sa confirmation proceedings sa SP si Dr. Tabios kung aha gipasaysay dinhi ang iyang mga gimbuhaton isip Provincial Health Officer ug ang nag-una nga tulomanon sa maong buhatan, subay sa naaprobahang Internal Rules of Procedure sa SP, nga mao ang mga mosunod: ang PHO mao ang tigpatuman nga opisina sa mga programa sa pangagamhanang probinsyal may kalabutan sa maayong panglawas, unsaon nga makalikay sa mga sakit ug pagmintina ug pagpalambo sa kahimsog sa panglawas sa katawhan niini; gitahasan usab ang PHO nga maghatag sa tambag ngadto sa gobernador ug sa mga miyembro sa SP kabahin sa pagpatuman sa mga ordinansa, polisiya mahitungod sa panglawas ingon man ang pakig-abag alang sa katukoran sa mga lokal nga balaodnon, sama sa sanitary laws.

Gipangutana usab ang may kalabutan sa maayong panglawas, ilabi na sa mga gihingusgan karon sa nasudnong pangagamhanan, pinaagi sa Department of Health, nga vaccination sa katawhang Pilipino sa tinguha nga makab-ot ang herd immunity ning panahon sa pandemya nga hatud sa COVID-19. Labaw sa tanan, gipasabot ni Dr. Tabios nga ang maong lakang, dili pugsanay ug nagkinahanglan kini sa consent sa mga tawo kung magpa-bakuna ba o dili.

Si Dr. Gary Guido Tabios, Jr. nag-edad ug 34 anyos, sobra unom ka tuig nga anaa sa medical practice, tulo ka tuig sa Provincial Government of Bukidnon, partikular sa Bukidnon Provincial Medical Center (BPMC), ug gitudlo ni Governor Zubiri isip acting provincial health officer niadtong June 21, 2020, hulip sa mi-retirong provincial health officer nga si Dr. Ricardo L. Reyes.

Facebook Comments