Report ni: Jennifer Debaja Palomo
Isa ka domestic helper sa HK ang gindulaan sang kabuhi matapos nahulog samtang naga limpyo sang bintana sa isa ka high-rise apartment sa Tseung Kwan O (TKO) sang Miyerkules, Hulyo 25.
Ginkumpirmar naman ni Consul Paul Saret, head sang Philippine Consulate General-Assistance To Nationals Section, nga gin pahibalo na ang iya opisina sang Tseung Kwan O police nga indi Filipina ang biktima .
“We confirmed with the TKO police that the worker who fell was not a Filipino; she was Indonesian,” pahayag ni Consul Saret .
Base sa nag sirkyular nga balita sa Local media isa ka 39 anyos nga foreign domestic worker ang napatay sang nahulog ini sa apartment sa The Wings II Complex sa No. 12 Tong Chun Street, Tseung Kwan O.
Suno sa report sang kapulisan, isa ka 22 anyos nga employer ang nagtawag sa estasyon agud ereport ang pagkahulog sang ila domestic worker samtang naga panglimpyo sang bintana.
Gilayon nga nag responde ang kapulisan kag gindala pa sa ospital ang biktima apang gindeklara ini nga patay na.Wala man sang patimaan o nakit an nga suicide note ang mga imbistigador.
Tungod sa natabu , liwat nga gina remind ang tanan nga sugod Enero 2017, gina dumilian na sang gobyerno sang Hong Kong ang mga foreign domestic workers sa pag limpyo sang bintana kag klaro ina nga nakasulat sa kuntrata.
Kon maglimpyo man ang isa ka worker sa gwa nga parti sang bintana , dapat may grills ini nga naka kandado kag wala sang parti sang lawas ang naga gwa sa ledge magluwas sang kamut lamang .
Nangin topiko man sa Filipino Community ang isyu sang pagpanglimpyo sang bintana matapos nag viral sang Hulyo 6 ang litrato sang isa man ka foreign worker sa delikado nga kahimtangan kon sa diin nagatindog ini sa gwa sang ika 22 nga panalgan sang building samtang naga limpyo sang bintana sa Kornhill Gardens, Quarry Bay .
Naga pangabay man ang Labour Department sa publiko nga magtawag gilayon sang police kon may makita nga foreign domestic worker nga naga limpyo sang bintana sa delikado nga sitwasyon agud malikawan ang pareho sini nga insidente.
