Natigayon nga ma-rescue sang mga katapo sang Philippine Coast guard ang mangingisda nga nagpautaw-utaw sa lawod sa Distrito sang Arevalo kahapon sang hapon.
Ginkilala ang na-rescue nga si Ramil Panique sang barangay Alegre, Oton, Iloilo.
Ginpahayag nga mga ala una kahapon sang hapon sang nagpatunga sang lawod si Panique sakay sa iya balsa agud kuhaon ang isa pa ka balsa sa tunga sang lawod.
Apang bangud sa kabaskug sang mga balud, indi na ini makabalik sa higad kabangdanan nga nagpabilin ini sang pila ka oras sa tunga sang lawod kag nagpa-utaw-utaw.
Natigayon sini nga makuha ang atensyon sang mga tawo kon sa diin ang mga barangay officials sang barangay Alegre, Oton ang nagtawag sang Coast guard kabangdanan nga ini siya ang narescue kag yara na sa luwas nga kahimtangan.
