Davao City – Miapelar karon ang Philippine Councilors League (PCL) ngadto kang Pres. Rodrigo Duterte nga tugotan sila nga makakupot og armas taliwa sa nagpatigbabaw nga Martial Law sa Mindanao.
Nag-ugat ang apelar sa PCL sa pagpamusil patay sa mga opisyales sa pipila ka lugar sa nasud kung asa unang gipatay ang Mayor sa Tanauan City, Vice Mayor sa Nueva Viscaya ug sa Tawi-Tawi.
Giingon ni PCL Chairman ug 2nd District Councilor Danilo Dayanghirang nga nakig-istorya kaniya ang kadaghanan sa mga konsehal nga hangyoon ang pangulo nga tugotan sila makadala og armas.
Segun ni Dayanghirang nga buot sa mga konsehal madepensahan ang ilang mga kaugalingon gikan sa mga mamumuno nga buot mupatay kanila.
Buot sab sa mga konsehal nga masiguro ang ilang seguridad ug kaluwasan sa tanang panahon hilabi na nga nagkaduol ang piniliay sa nasud ug dili malikayan nga mas muinit pa ang bangi sa politika.
Giingon ni Dayanghirang nga iya na napaabot kang Special Assistant to the President (SAP) Christopher ‘Bong’ Go ang hangyo sa mga konsehal atol sa nakalabay nga command conference sa Malacañang.
RadyoMaN Joel Viray
