Opisyal nang gibuksan ni Presidente Rodrigo Duterte ang Philippine National Games kun PNG 2018 sa Cebu City Sports Center pasado alas 7:00 karong gabii .
Sobra sa 8,000 ka mga atleta gikan sa dul-an 100 ka lokal nga mga kagamhanan lukop nasud ang misalmot sa maong torneyo nga pulos gipahimangnoan sa Presidente labot sa importansya sa patriotism, camaraderie o panaghigalaay, ingon man ang tibuok niyang suporta sa mga atleta .
Atol sa speech ni Duterte, nangayo gilayon og pasaylo ang Presidente ngadto sa mga atleta, opisyales, ug ubang misaksi sa opening ceremony sa maong torneyo human siya nalangay sa iyang pag-abot sa maong kalihokan nga unang gitakda og alas 5:00 sa hapon apan pasado alas 7:00 na sa gabii.
Apan taliwa sa pagkalangay og abot ni Duterte wa mapul-an ang mga naghuwat kaniya ilabi na ang mga atleta ug labihang nalipay alang sa luwas nga pag-abot sa Presidente sa Cebu City Sports Center nga gikan pa sa lungsod sa Alegria diin motambong sab kini og laing kalihokan .
Gipahibawo sab ni Duterte atol sa maong opening ceremony sa PNG ang pagdugang niini sa mga premyo alang sa mga modaug sa maong kompetisyon .
Gidugangan ni Duterte ang premyo alang sa mo-kampeyon sa torneyo diin gikan sa 5 million pesos mamahimo na kining 10 million pesos, 8 million pesos na alang sa first place gikan sa 4 million pesos, 6 million pesos alang sa second place gikan sa 3 million pesos.
Dugangan sab og 2 million pesos alang sa third place diin mamahimo na kining 4 million pesos , ug 2 million pesos na gikan sa one million pesos ang madawat alang sa fourth place .
Sugdan na ugmang adlawa, Mayo 20, ang tournament games sa PNG 2018 ug maghangtod kini sa Mayo 25 diin himoon ang nagkadaiyang sporting events sa lain-laing bahin sa probinsya sa Sugbo .
