Davao City – Gitumbok sa Regional Disaster Risk Reduction and Management Council XI (RDRRMC XI) nga ang paglihok sa Philippine Trench ang rason kung ngano natigayon ang Magnitude 6.8 nga linog kagahapon sa hapon.
Gibutyag ni RDRRMC XI Spokesperson Franz Irag, nagsumikad sa tunga-tunga sa dagat sa Glan, Sarangani Province ang tinubdan sa linog nga dunay gilawmon nga 68 kilometros diin ang sentro sa linog mao ang Davao Occidental, hinoon dili pa masuta kon unsay rason sa paglihok sa Philippine Trench kagahapon adlawa.
Giingon ni Irag, wa nagmugna og tsunami sa dagat sa Davao Occidental ang mao nga pagtay-og, hinoon, ang mga kabaybayonan sa Rehiyon 12 namatikdan ang pila ka metros nga pagsibog sa dagat apan wa’y gideklara nga tsunami alert ang PHILVOCS ug ang RDRRMC.
Nasayran nga nasinati ang intensity sa pipila ka dapit sa Mindanao sama sa Davao Region ug sa Davao City anaa sa Intensity 5, ug wa’y namonitor nga aftershocks sa mga lugar nga gihampak sa linog.
Segun ni Irag, walo ka balay ang partially damage diin pito sa lungsod sa Jose Abad Santos Davao Occidental, ug usa sa Lupon Davao Oriental diin wa’y natala nga dunay namatay o naangol sa maong insidente.
Samtang sa Davao City, nakasinati og minor crack ang pipila ka gambalay nga gilangkuban sa publiko ug sa pribado, ug wa’y nasamdan o namatay sa linog dinhi sa dakbayan gahapon adlawa.
Sa karon, nagpadayon pa ang gilusad nga Rapid Damagement Assessment sa Provincial Disaster Risk Reduction and Management Office aron sutaon ang kinatibuk-ang danyos nga posibling gibilin sa makusog nga linog.
RadyoMaN Joel Viray
