PHIVOLCS giimbestigahan ang sitwasyon sa Mt. Leonard human sa linog

Davao City – Nanghinaut ang Municipal Disaster Risk Reduction and Management Office (MDRRMO) sa New Bataan, Davao de Oro nga mamahimong positibo ang resulta sa ginahimong imbestigasyon sa Philippine Institute of Volcanology and Seismology (PHIVOLCS) sa Mount Leonard Kniaseff sa Maco, Davao de Oro.

Kini human nga gikabalaka sa Dabawenyos nga nagbaton og discoloration ang maong active volcano human sa sagunson nga linog.

Sa interbyu sa DXDC RMN Davao kang Lynne Dollolasa, MDRRMO Officer sa Local Government Unit (LGU) New Bataan, miabot kagahapong adlawa, Marso 9, 2023 ang personahe gikan sa PHIVOLCS central office pag-imbestiga sa sitwasyon sa bulkan, diin una na nga giingon sa buhatan nga dili muresulta sa volcanic activity ang mga nahitabo nga linog sa Davao Region.

“Adunay team nga miadto didto sa Kniaseff, sa (Mount) Leonard aron pud nga sutaon ug tan-awon gyud ang maong kahimtang aron makapahibalo ‘ta kung unsa ang kasamtangan nga kahimtang,” matud ni Dollolasa.

Samtang, nahimong produktibo usab ang unang quarter sa Nationwide Simultaneous Earthquake Drill (NSED) 2023 kagahapon, Marso 9, 2023 diin lakip sa mipartisipar ang mga empleyado sa DXDC RMN Davao.

Tumong niini, nga maandam ug ma-practice ang muscle memory kung unsa ang angayan nga buhaton panahon sa mga pagtay-og.

RadyoMaN Kirby Manzon