RMN Laoag – Dimmanun iti 18 a nakitaan ti sintomas ti sakit a measles wenno kamuras iti Ilocos Norte.
Daytoy ti impalgak ni Dr. Josephine Ruedas, officer-in-charge ti provincial health office. Kinuna ni Ruedas, dagiti nakitaan ti sintomas ket maipadalan ti ‘verification’ manipud iti Department of Health (DOH) tapnu masigurado nu dagitoy ket naapektaran ti nasao a sakit.
Maibiahe dagitoy sadiay Metro Manila tapnu dumalan ti eksaminasyon ken dadduma pay a panagsukisok mainaig ti salun-atda.
Innayun ni Ruedas nga awan pakadanagan ti publiko ngamin ta nakasagana ti probinsya ken kasta pay ti rehiyon mainaig iti panangsaluad kadagiti umili.
Basar ti World Health Organization (WHO) manipud Enero uno agingga Pebrero 23, 2019, umaboten ti 12,736 measles cases ket 203 ti pimmusay iti kamuras iti pagilian a Pilipinas a makita iti record ti DoH.
Rumrumuar a ti agtawen 2 aginggana ti 5 ti agbalbalin a biktima wenno 57% iti intero a pagilian. Iti agdama adaan ti 63% ti saan pay a nabakunaan iti Pilipinas.
Nu makitaan iti sintomas dagiti ubbing, umasideg laeng iti rural health unit (RHU) iti ili wenu tumawag ti opisina ti PHO (077) 772-1196.
Bernard Ver, RMN News
