Davao City – Gipahunong sa Provincial Health Office sa Davao Occidental ang paggamit sa poso sa Barangay Butuan, Jose Abad Santos, Davao Occidental.
Sa ekslusibong interbyu sa RMN Davao kang Prince Paraiso, Davao Occidental Provincial Health Office Health Education and Promotion Officer, positibo sa amoebiasis ang mga pasyente nunot sa kontaminadong tubig.
Gilantaw sa mga health investigators nga ang hinungdan sa diarrhea outbreak ang hugaw nga tubig nga gikan sa poso ug banyo nga anaa sa 20 metros ang gilay-on sa ilahang ginakuhaan og tubig.
Dugang pa niini, pweding daot nga pagkaon niadtong nakalabayng Bag-ong Tuig ang posible usab nga mga hinungnan.
Balik na ang mga tawo sa lugar sa pagkuha og tubig gikan sa gripo human kini nadaot niadtong Disyembre diin napugos ang mga residente nga mukuha og tubig sa poso.
Subay niini, gi-chlorinate na ang tanang source sa tubig sa lugar ug gipatanggal na ang mga poso.
Gibutyag ni Paraiso, nga sukad niadtong Disyembre 25, 2020 anaa sa 52 ang naapektuhan sa kontaminadong tubig sa lugar ug naospital ug usa ang natalang namatay.
Kontrolado na ang insidente ug dili muubos sa 20 ka tao na lang ang nagpabilin sa ospital ug anaa sa maayo ang pagrekober sa mga pasyente.
RadyoMaN Aimee Guinita
