Davao City – Gibutyag sa Provincial Health Office (PHO) sa Davao del Norte nga kadaghanan kun majority sa mga kaso sa Coronavirus Disease 2019 (COVID-19) sa probinsya wala pa nabakunahan sa COVID vaccine.
Atol sa One Davao on COVID-19 Virtual Presser, gibutyag ni Dr. Alfredo Lacerona, Department Head sa Provincial Health Office sa Davao del Norte, nga as of August 2021, 78% sa COVID-19 cases, walay bakuna batok COVID-19, 13% kadtong fully vaccinated ug 9% ang nabakunahan sa first dose.
Nasayran usab nga mabutang sa severe case ang kadtong mga wala pa nabakunahan batok COVID-19 samtang mild lamang nga kondisyon ang nasinatian sa mga bakunado na.
Gisulti ni Lacerona nga sagad gihapon matala ang COVID-19 transmission sa mga social gatherings, mga trabahoan, opisina nga madala ngadto sa mga panimalay.
“Kasagaran makuha sa mga social gatherings, sa offices, sa work place kay sa work place naa gyud didto o dili gyud malikayan daw nga magdungan sila og kaon, so mao ‘tong time nga magtanggal ka og mask. Then, pag-uli nimo sa imuhang balay, matakdan nimo ang imuhang pamilya,” saysay ni Lacerona.
Giawhag sa health official nga istriktong sundon ang minimum public health standards batok COVID-19 ug magpabakuna kung aduna nay higayon.
RadyoMaN Kirby Manzon
