Zamboanga del Norte – Giaprubahan ug gidasonan karon sa mga sakop sa Sangguniang Panlalawigan sa Zamboanga del Norte sa pagpangulo ni Vice-Governor ug Presiding Officer Senen O. Angeles ang gipadangat nga sulat-hangyo ni Governor Roberto Y. Uy alang na sa pagpasar sa Fiscal Year 2018 General Fund Proper Supplemental Budget No. 6 nga nagkantidad sa mokabat sa Php 13, 235, 033.61 atol sa gipahigayon nga regular session niini sa Lunes, Disyembre 3, 2018.
Si Board Member Romulo P. Soliva isip Vice-Chairman sa Committee on Finance and Appropriations ang mipasupot sa appropriation ordinance alang sa pagpasar sa una, ikaduha ug ikatulo nga pagbasa sa FY 2018 General Fund Proper Supplemental Budget #6 nga may kinatibuk-ang kantidad nga Php 13,235,033.61 aron magamit sa paggasto sa gikinahanglan nga mga programa, proyekto ug mga lain-laing aktibidad sa probinsiya sa pagtapos sa tuig 2018.
Ang pagpasupot sa nasangpit nga supplemental budget #6 gipamatud-an usab sa mga sakop sa Local Finance Committee nga nagalangkub nila ni Provincial Budget Officer Mary Joy A. Abitona, Provincial Accountant Marivic SU Carpitanos ug Provincial Treasurer Jessie A. Concepcion alang sa pundo nga pagakuhaan.
Kahinumduman nga subsob karon ang pagpatuman sa mga proyekto ug programa sa tibuok probinsiya ilawom sa hiniusa nga administrasyon nila ni Governor Roberto Y. Uy ug Vice-Governor Senen O. Angeles aron mapahimuslan sa mga katawhan nga nanimuyo niini. (edith/kapihan)
