Davao City – Alang kang Barangay 76-A Kapitan Bogart Trajera nga dili makunsidara nga diskriminasyon ang paglikay sa kaugalingon gikan sa mga tawo nga mag-ubo ug mangatsing kun magpakita og sintomas sa Coronavirus Disease 2019.
Giingon ni Kapitan Trajera nga walay ni usa makasiguro kung kinsa ang COVID-19 infected maong dili matawag nga diskriminasyon ang paglikay sa tawong mag-ubo kun magpakita og sintomas sa balatian.
Busa dili angay ikalain sa uban kung likayan sila sa ilang ka-istorya kun sa mga silingan kay ang mga karon naniguro ug nagdepensa lang pod sa ilang mga kaugalingon gikan sa maong virus.
Nagtoo si Kapitan Trajera nga wala malisdi ang mga infected sa medical treatment ug gani ang mga natakdan kun bisan ang kadtong nagbaton pa lamang og sintomas gitambalan man sa gobyerno.
Ang bugtong hangyo sa barangay opisyal ngadto sa mga tawong may sintomas sa COVID-19 magpundo ug magself-quarantine sa ilang mga balay hilabi na sa mga dunay travel history local man o abroad aron dili panghimarauton sa uban.
Ang pagsunod sa lockdown ug dili pagsupak sa mga guidelines ang pinakamaayong kontribusyon nga ma hatag sa katawhan aron hingpit mapildi ang COVID-19 nga mihampak sa kalibutan karon.
Sa panahon sa COVID-19, ang pagsalig sa Dios ang labing gikinahanglan sanglit ang mga dili mahimo sa tawo, posible ug mahimo sa Ginoo tungod sa iyang pagkagamhanan.
RadyoMaN Joel Viray
