Pickup truck nawad-a’g kontrol, nabalintong

Davao City – Daling gidala sa ospital ang pito ka mga pasahero sa Ford Ranger pickup truck human kini nabalintong atol sa disgrasya sa Daang Maharlika Prk. 1A, Brgy. Poblacion, Mawab, Davao De Oro alas 4:10 sa hapon, June 9, 2024 (Dominggo).

Sa interview sa DXDC RMN Davao kang PMSg. Alfie Himagan, Traffic Investigator sa Mawab Municipal Police Station, iyahang gisaysay nga gikan Tagum City padulong Sta. Josefa, Agusan del Sur ang pickup nga gimaneho ni Jerson Gardose, 35 anyos, taga Brgy. Tapaz, Santa Josefa.

Nasayrang pag-abot sa lugar, tungod sa kadanlog sa dalan, nawad-an og kontrol ang sakyanan hinungdan nga nabanggaan niini ang Toyota Innova nga gikan Butuan padulong Davao City. Tungod impact, nabalintong ang pickup vehicle.

“Na-swerve siya didto sa opposite lane, naigo ang Innova sa side impact. Mao to na-lose control, nabalintong hinuon ang sakyanan nga Ford Ranger,” saysay sa imbestigador.

Samtang, usa ka menor de edad sa pito ka pasahero ang reported injured nga gihatagan gilayon og medical nga atensyon. Gitakda usab nga mag-settle ang duha ka kampo.

RadyoMaN Kirby Manzon