ILOILO CITY – Tatlo ka serious neglect of duty kag isa ka simple neglect of duty ang ginrekumendar nga ipasaka sang ADHOC committee nga nagaimbestigar sa maanomaliya nga pagpanagtag sang native nga manok sa mga 4P’s beneficiaries sang syudad.
Maluwas diri ginrekumendar man sang committee ang rejection sang deliveries sang Foodwealth Agrovet Trading ni Mr. Gaspar Iguna.
Suno kay City Administrator Atty. Hernando Galvez ini ang mga rekumendasyon nga ginpadangat sang ADHOC committee kay Mayor Jose Espinosa III.
Pahayag ni Galvez ini nga rekumendasyon sang ADHOC committee ipaidalum sa approval ni Mayor Jose Espinosa III.
Sa ti-on nga aprobahan ini sang alkalde, magatukod sang hearing officer kun sa diin mangin respondents na ang mga empliyado nga pasakaan sang kaso.
Paathag ni Galvez sundon nila ang revised 2017 guidelines sang civil service commission sa pagpamati sa mga administrative cases.
Suno sa city administrator possible magapangatubang sang dismissal sa serbisyo ang mapamatud-an nga may kapaltahan sa isyu.
Una na nga nabukaran ang undersized nga gindeliver nga mga manok sa Community Food production program sang City agriculture Office kun sa diin manubo sa nakasugtan sa term of reference nga magabug-at sang 300 grams ang ideliver nga manok sa mga beneficiaries.
May budget ang proyekto nga kapin sa P3.4 million.
