Pila ka mga negosyante sa banwa it Kalibo ag Numancia hadali it manogloko

25

Kalibo, Aklan – Ginpaidaeom makaron sa hot pursuit operation it mga kapulisan rong sangka babaye nga nagapang edaron 60 hasta 65 anyos nga nagpangloko it pila ka mga negosyante sa banwa it Numancia ag Kalibo.
Sa pakikipag-angot it RMN DYKR Kalibo kay Police Staff Sergeant Felizardo Navarra Jr., it Numancia PNP nga rong nasambit nga babaye hay nahakilaea eamang kay FELOMINA PUNZALAN FUENTES ag taga Poblacion, Tangalan.
Nag renta it space sa may Laguinbanwa East, Numacia ag may pangaean nga Fuentes Consumers Goods Traiding kung sa siin kompleto man raya sa mga business permits.
Pila sa mga nahaluko ko nasambit nga babaye ro sangka negosyante it bugas sa Numancia nga nahabue-an na it 35 ka sako ag nagabalor it P 68,600.00, negosyante it itlog nga nahabue-an it 700 ka tray nga nagabalor it P 118,000.00, sangka Hardware nga nahabue-an it mga electrical supply nga nagabalor it P 80,000.00, manogbaligya it food supplement nga nahabue-an man it kapin P 62,000 nga balor ag sa Kalibo sangka baligyaan it Food Products nga nahabue-an man it sari-saring frozen foods nga nagabalor it P 25,000.00.
Dugang pa ni Navarra nga rayang mga negosyante hay gin isyuhan ko suspek it tseke nga may pangaean Security Bank, China Bank ag East West Bank nga puro talbog.
Nag isyu it tseke ko babaye Abril 12 adlaw nga Biyernes ag ginpetsahan na it Abril 15, 2019 kahapon kung sa siin kahapon man tanan nadiskubre ko anang gin isyuhan nga talbog raya tag mag deposit sanda sa bangko.
Sa pag imbestiga kahapon it mga taga Numancia PNP nasayuran nga rayang babaye hay may andang saeakyang Mitsubishi L300 FB nga may Plate No. ACB 1699 nga sa pag usisa rayang Plate No. hay naka rehistro sa sangka Chinese sa Davao.
Nasayuran man pinaagi kay Mr. Villanueva nga tag-ana ko gin rentahang space it suspek nga Sabado it hapon Abril 13 hay nagpinanghimos raya ag may mga tawohan nga nagkarga ko mga tinakawan ag suno kanda hay ma deliver eamang sanda sa isla it Boracay pero uwa eon nakabalik.
Pati pa si Mr. Villanueva hay hadali man bangud nga uwa ra imaw mabayi it full sa renta ko nasambit nga babaye.
Gina eauman pa gid it Numancia PNP nga basi madugangan pa rong mga maga report nga biktima it nasambit nga manogloko.
Nagpaandam man si Navarra sa mga negosyante nga indi basta-basta magsalig sa kustomer nga naga isyu it tseke kapin kon bukon it kilala.
Insigida man nanda nga gin impormahan rong mga port nga sarang agyan ko nasambit nga suspek.
(Itsura it suspek nga nahapicturan ko sambilog sa anang biktima)

Facebook Comments

From Advertisers