Maayon, Capiz- Lunsay pilason ang duha ka mga persona matapos naglab-anay ang mga ini alas 5:30 sang aga sa Sitio Alawihaw sa Brgy. Balighot, Maayon.
Suno sa mga kapulisan, ang pag-agaway sa palahalban sang karabaw ang gintunaan sang amu nga insidente.
Ginasiling nga una nag-abot ang suspek nga si Persito Tolentino y Dumulong,64-anyos sa lugar sa diin nagluntad ang komprontasyon sa tunga nila sang biktima nga si Nonito Rio y Aguro sang ini man ang nag-abot agud nga magpahalab sang alaga nga karabaw.
Bangud sa masingki nga baslanay sang mga tinaga, pareho nga naggabot ang mga ini sang dala nga mga sanduko kag naglab-anay.
Pareho ang mga ini nag-angkon sang kapilsan sa kamot kag iban nga parte sang lawas.
Una ang mga ini ginpangdangat sa Bailan District Hospital apang pareho man nga ginpang-refer sa separado nga ospital diri sa syudad sang Roxas agud nga madapatan sang dugang nga pagbulong.
© web photo
