Davao City – Numero unong nagdala og hulga sa seguridad sa kalibutan karon mao ang terorismo diin dili lamang ang abante ug moderno nga mga nasud pwede atakihon sa mga terorista.
Subay niini, dili lamang dugay nilanog ang usa ka taho nga adunay upat ka terorista nakasulod sa nasud ug maglusad og laing hugna nga Marawi siege ug ang mahimong puntirya mao ang Davao City.
Si Peace Builders Community Founder Rev. Daniel Pantoja naghatag sa iyang depinisyon diin ang paggamit og pwersang armado aron lisangon ang katawhan terorismo sama sa gibuhat sa Abu Sayyaf ug ISIS-Maute terror group.
Ang terorismo nihatud usab ug bangi sa relihiyon, politikanhong ideolohiya ug uban pang matang sa kaguliyang sa atong katilingban.
Nasuta sa mas lawom nga pagtuon sa mga batid nga ang terorismo sa presenteng panahon aduna lamay tulo ka tinubdan niini sama sa ideolohiya nga pakigbisog, non-state sponsored o dili kaha state sponsored.
Suma ni Pantoja, walay nasud sa kalibutan nga makalikay gikan sa atake sa mga terorista kay bisan gani ang Estados Unidos nga moderno naigo pa man gani sa terorismo.
Busa ma-Luzon, Visayas ug Mindanao man dili kaseguro nga dili mahimong target sa mga terorista aron tugawon ang kahapsay ug kalinaw sa atong dapit.
Alang sa Peace-Builder community founder, ang pagpakabana ug pagmahal sa gobyerno sa katawhan ang pinaka-epektibo nga hinagiban aron mabuntog sa hingpit ang terorismo nga nagdala og hulga sa seguridad sa atong palibot karon.
RadyoMaN Joel Viray
