Manila, Philippines – Pinaaaksyunan ni Bayan Muna Rep. Carlos Isagani Zarate ang libu-libong unfilled positions sa Department of Justice.
Sa pagdinig ng budget sa Mababang Kapulungan, sinabi ni Zarate na aabot sa 1,530 ang unfilled positions sa DOJ ngayong 2018 kung saan kasama dito ang 750 na mga empleyado na nasa job orders, contractuals at contract of service na status.
Ito rin umano ang bilang ng mga unfilled positions ng Kagawaran noong 2017.
Giit ni Zarate, hindi sumusunod ang DOJ sa joint circular order ng Department of Budget and Managament, Civil Service Commission at Commission on Audit na nagbabawal na sa job orders, contractuals, at contract of service sa pamahalaan.
Aniya pa, nag-hire ang DOJ sa kabila ng inilaang pondo para sa pagkuha ng mga regular na empleyado.
Pero paliwanag naman ni Justice Sec. Menardo Guevarra, sinusubukan na nilang punan ngayong taon ang mga unfilled positions lalo na ang nasa prosecution service.
Sa kasalukuyan aniya ay mayroong 400 hanggang 500 na posisyon sa DOJ ang naghihintay ng appointment na aaprubahan ng Malacañang.
