PINAIIMBESTIGAHAN | Promotion sa teaching personnel, ipinasisiyasat sa Kamara

135

Manila, Philippines – Pinaiimbestigahan ni ACT Teachers Reps. Antonio Tinio at France Castro sa Kamara ang polisiya ng Department of Education sa promotion ng mga teaching personnel.

Inihain nila Tinio at Castro ang House Resolution 2061 kung saan ipinasisiyasat in aid of legislation ang mabagal na promosyon sa mga guro.

Tinukoy ng mga kongresista ang ilang hadlang sa ‘career advancement’ ng mga guro kabilang na dito ang napakaraming requirements, paghawak ng mga subjects na wala sa linya ng kanilang kabihasaan o specialization at limitadong plantilla items para sa mas mataas na posisyon.

Ang mga problema sa sistema ng promotion ng DepEd ang dahilan kaya maraming mga guro na inabutan na ng pagreretiro pero nasa entry level o Teacher I position pa rin.

Batay sa tala ng DepEd, sa 687,229 teaching population nasa 360,205 o 52% ang nasa entry level position habang 50,471 0 7.3% lamang ang Master Teachers.

Dagdag pa na dahilan sa mabagal na promosyon sa mga guro ay ang kakaunting items na inilalaan taon-taon para sa higher positions.

Sa ilalim ng 2018 budget, ang alokasyon lamang para sa promosyon para sa Master Teachers ay nasa 344 lamang gayong daang libong mga guro ang naghihintay na mai-promote.

Facebook Comments