Muling pumalo sa 48°C ang naitalang heat index kahapon sa Dagupan City sa makailang beses na pagkakataon.
Malayo ito sa 44°C na heat index forecast, bagamat paalala ng PAGASA na nagbabago ito hanggang sa alas singko ng hapon sa bawat araw.
Inihayag ng weather bureau na maaari pang umabot sa 50°C ang maitatalang heat index na maaaring maranasan sa iba’t-ibang bahagi ng bansa.
Aniya, ang pinakamataas na heat index ay posibleng maranasan ngayong buwan ng Abril o Mayo.
Dagdag nito na kahit sa gabi ay maaari pa ring maranasan ang init ng panahon dahil sa ganap na pag-iral ng dry season.
Kaugnay nito, iginiit ng health authorities ang iba’t-ibang mga hakbang na makakatulong upang maibsan ang init na nadarama lalo ngayong ilang mga Pangasinense na ang nakaranas ng heat-related illnesses tulad ng heat cramps, heat exhaustion, at heat stroke. |𝙞𝙛𝙢𝙣𝙚𝙬𝙨
