Pinakataas Nga "Urban Road" Sa CDO

Cagayan de Oro City – Dako na ang makita nga kausaban sa syudad sa Cagayan de Oro kung ikumpara kini sa niaging dekada. Pipila ka dagkong establisyemento na ang natukod ug ubay-ubay na usab ka mga bag-ong dalan ang nabuhat nga nakapa-usab og dako sa hulagway sa syudad. Ang pangutana, nasayod ka ba kung unsa ang pinakataas nga dalan sa syudad sa Cagayan de Oro?

Matud sa City Engineer’s Office, kung urban road ang hisgutan, ang JR Borja Street ang pinakataas nga dalan sa syudad. Kini adunay kataas-on nga 4.82 Km. Apan, nasayod ka ba kung asa gikuha ang pangalan nga “JR Borja”?

Ang pangalan sa dalan nga JR Borja Street gikuha sa pangalan sa giilang “The Best Mayor of The City of Cagayan de Oro” nga si former City Mayor Justiniano R. Borja. Siya nagserbisyo isip mayor sugod niadtong 1954 hangtud sa iyang pagkamatay niadtong Oktubre 3, 1964. Gipangalan kaniya ang dalan nga JR Borja isip paghatag pasidungog sa iyang maayong pagdala sa dakbayan.


Gawas niini, gibuhatan usab siya’g Monumento nga makita sa Golden Friendship Park sa Divisoria ug gingalan usab kaniya ang hospital sa syudad mao ang JR Borja General Hospital. Siya pa usab ang nahimong mayor sa dakbayan nga nahatagan og doctorate degree nga “Honoris Causa” in public administration nga gihatag sa Xavier University – Ateneo de Cagayan niadtong 1963.

Aduna ba kay pangutana o reaksyon kabahin niini? Mamahimo nimong i-comment sa ubos.

Facebook Comments