Pinakaunang Maritime Inter-Agency Exercise sa EastMinCom gipahigayon

Davao City – Nagmalampuson ang gihimong pinakaunag Maritime Inter-Agency Exercise sa Eastern Mindanao Command (EastMinCom) sa Talicud Island sa Island Garden City of Samal (IGaCoS), Davao del Norte, kagahapon sa buntag (Hunyo 25, 2021).

Sa interbyu sa DXDC RMN Davao kang EastMinCom Spokesperson Major Alex Mindalano, gibutyag niini nga ubay-ubay sa mga maritime agencies ang mipartisipar sa aktibidad sama sa Philippine Coast Guard (PCG), Philippine National Police (PNP) Maritime Group, Naval Forces Eastern Mindanao ug Bureau of Fisheries and Aquatic Resources (BFAR).

Matud ni Mindalano, dako og kahimuan ang aktibidad sa pagsukod sa kaandam sa maritime law enforcement units sa pagresponde kontra terorista nga moatake sa rehiyon ilabi na sa maritime area, diin usa usab sa gibansay mao ang kidnapping scenario kung unsaon ma-detect, malikayan o marespondehan ang insidente.


“Isa na sa mga ginabuhat nato para ma-test nato ang interoperability sa atong mga Maritime Inter-Agency. Kadtong atong gibuhat is himuon na nato nga regular nga Maritime Inter-Agency Exercise diri sa atoang area,” sulti ni Mindalano.

Gibutyag usab sa tigpamaba sa EastMinCom nga wala silay namonitor nga hulga sa mga terorista dinhi sa rehiyon diin padayon usab ang ginahimong regular nga maritime patrol sa pagsigurong luwas sa unsa mang hulga sa terorista ang Davao Region.

RadyoMaN Kirby Manzon



Facebook Comments