Report ni: Jennifer Palomo Debaja
Gin pamatbatan na sang 15 ka tuig kg 5 ka bulan nga mapriso ang pinay drug mule nga si Imelda G. Penacosa , 45 anyos kag may 3 ka kabataan matapos nag plead guilty sa kaso nga drug trafficking.
Nakumpiskar kay Penacosa ang 3 ka kilo nga cocaine sang mag abot ini sa HK International Airport sang Pebrero 13 sang nagligad nga tuig halin sa Dubai. Gina patihan nga may street value ang druga nga $4million hong kong dollars.
Nahibaluan base sa imbistigasyon nga naga ubra sa Macau bilang domestic helper si Penacosa sang nakilala ang isa ka Filipina nga si Jennifer kg ang partner sini nga si Edilberto. Gin engganyo siya ni Edilberto nga mag pa Dubai para sa isa ka business seminar agud maka tsansa nga e hire ini sang boss sa ila kumpanya.
Si Jennifer ang nag provide sang roundtrip ticket sini pa Dubai pati ang hotel accomodation .Pebrero 8 sang gingawadan ini sang ferry ticket halin Macau pa HK agud maka flight via Emirates Airlines pa Dubai.
Sa hotel room , ginbisita sya sang 2 ka lalaki nga ang isa ginkilala nga utod ni Jennifer. Gintagaan sya sang cellphone agud mahapos ang pagkuntak sa iya. Gin instruksiyunan man ini nga tawgan ang certain Tony nga amo ang big boss.
Ginpangayuan sya sang picture ni Tony para mahapos kuno ang pag pakigkita sang utod nga si Mike kay Penacosa.
Nakibot nalang ini sang Pebrero 13 pag abot sa airport nga ara si Jennifer nagahulat sa iya tungod isa lang ka eroplano ang sakyan nila pabalik sa HK. Ginhatagan siya ni Jennifer sang 3 ka lata nga chocolate para kuno pasalubong sa kabataan sini. Likum sa iya ihibalu amuna gali atu ang maga pahamak sa iya.
Tungod seryoso nga krimen ang drug trafficking sa HK , ginbalibadan sang korte ang appeal sang abogado ni Penacosa nga e consider ang pag plead guilty sini agud matagaan sang malip ut nga sentensiya.
Nagpasalig man si Penacosa nga bisan napriso na ini,padayun siya nga maga kooperar sa awtoridad agud madakpan si Jennifer kag ang mga kaupdanan sini nga nagbiktima sa iya.
