Davao City – Gumikan sa kahadlok nga basin adunay dautang mahitabo usa ka pangulo sa kahugpungan sa mga kababainhan ang nagpatabang sa Sasa PNP aron maprotektahan kini gikan sa koreano nga naghulga kaniya.
Sumala ni Rita Ado, hamtong ang pangidaron, Gabriela president ug nagpuyo sa Malagamot Panacan nga usa ka Koreano nga si Jung Cheol alyas Alex ang nanganti sa iyang kinabuhi karong panahona.
Segun ni Ado nga niadtong Enero 22, 2018 nakadawat kini og mensahe sa email kang Jeong ug nagbahad nga patyon siya ug ang iyang gi-asister nga laing koreano nga magbubo og negosyo dinhi sa siyudad.
Matud ni Ado, sukad pa miaging tuig nagsige og pangharrass kaniya ang suspek sa walay igong rason bisan og atubangan sa pipila ka konsehal ning dakbayan.
Sugilon pa niini nga usa ka impormasyon ang miabot kaniya nga gigamit ni Jeong ang iyang pangalan sa pagpangayo og donasyon sa mga negosyante sa Korea nga walay pagtugot gikan kaniya.
Dugang saysay sa complainant nga lakip gipangantihan ni Jeong si Mr.Sung kung mudayon og butang og patigayon dinhi sa dakbayan.
Giyagyag pa sa Gabriela president nga gikulata usab sa nasangpit nga Koreano ang iyang uyab nga Pinay sa usa ka hotel sa atong nasud.
Mihimo na karon og pagpanubay ang Sasa PNP aron sutaon ang kamatooran sa reklamo ni Ado.
RadyoMaN Joel Viray
