Report ni: Jennifer Palomo Debaja
Dakop ang isa ka 31 anyos nga Filipina sang Martes Disyembre 18, 2018 sa Macau International Airport pila ka minutos matapos naglanding ang eroplano nga ginasakyan sini halin sa Manila.
Sa naglapta nga balita, gina alegar nga nainvolve ang Pinay kag 6 ka upod sini sa pag pickpocket sa mga turista nga Intsik sang nagligad nga Oct. 5, Oct. 7 kag sang National Day sa Macao.
Ginapatihan miembro ang Pinay sang isa ka sindikato nga naga pang biktima sang turista kag naga operate sa pila ka lugar pareho sang Casino kag hotels.
Tatlo ka turista gikan sa Mainland China ang nagreklamo sa police nga nadulaan sila sang kwarta sa bus stop malapit sa border gate samtang yara sa escalator sang casino kag samtang ang isa ang nabiktima sang pickpocket sa sulod mismo sang shuttle bus.
Masobra 78,000 Macau patacas (US$9,665) ang nakuha sa mga biktima. Sa imbistigasyon sang Macao police, gina patihan isa lang ka sindikato ang may kahimuan sang pag pangpickpocket.
Gina suspetsuhan man sang kapulisan nga ang modus sang sindikato amo ang pag palibot sang mga suspek sa mangin biktima kag mag pa kuno kuno ang isa ka upod nga may nahulog nga gamit agud makuha ang atensiyon sini kag mangin mahapos sa kaupdanan ang paghimo sang pagpangawat.
Nagapabilin sa kostudiya sang otoridad ang pinay samtang padayon ang paghunting sa anom pa ka kaupdanan sini.
