Report ni: Jennifer Palomo Debaja
Nagahilibion ang isa ka 48 anyos nga Pinay DH sa HK matapos ginpamatbatan sang Hunyo 24 sang 8 ka bulan nga pagka priso sa kaso nga money laundering.
Nag plead guilty sa two counts sang money laundering sa Eastern Magistrates Court si Jeanette C. Rodriguez, sang Ying Hong Street, Tung Chung, Lantau Hong Kong matapos napamatud-an sang mga police ang partisipasyon sini sa transactions sa iya duwa ka account nga naga balor sa $677,331.04 o 4.4 million pesos.
Sa imbestigasyon sang HK Police, nangin kasabwat si Rodriguez sa pag pang scam sang iya “online boyfriend” sang balor (P4.4 million pesos) sa apat tanan ka mga Intsik.
Nahibaluan nga gindeposito sang apat ka mga Intsik ang nasambit nga kwarta sa account ni Rodriguez matapos naintuan man sila nga ginpangaluyagan sang online boyfriend ni Rodriguez nga ginkilala kay Mr. Brown.
Suno sa pinay nga isa ka single mother, natintar ini kag nangin kabahin sa laundering scam tungod ginpangakuan sang lalaki nga nakilala sa Facebook nga pakaslan siya sini. Gin oferan man ang pinay sang $12k sang dirty money sa ila transaction.
“Gina aku ko,” pahayag ni Rodriguez Kay Eastern Presiding Magistrate Peter Law.
Tungod sa iya guilty plea, ginpamatbatan si Rodrigues sang walo ka bulan nga pagka priso imbis 15 ka bulan nga dapat prisuhan sini.
