Report ni Tita Jen Palomo Debaja
Posible madula an sang obra kag papulion sa Pilipinas ang isa ka pinay sa Singapore matapos gina alegar nagtuyo ini nga maghikog paagi sa paglumpat sa ika 4 nga panalgan sang apartment nga iya gina obrahan.
Ginkilala ang OFW kay alyas Rachel, 28 anyos kag naga obra sa Bishan, Singapore.
Base sa pahayag sang Pinay kahapon, Agosto15, huwebes, maswerti ini nga naka survive sa pagkahulog apang indi madumduman ang natabo. Suno sa iya nakibot nalang ini nga yara na sa ospital kag indi na makatindog.
Sa nagcirculate nga balita sa lokal media sa Singapore, natabo ang insidente takna alas 9 sang aga sang Agosto 5, 2018 sa Block 153, Bishan Street 13. Nakita ang OFW sang isa ka 70 anyos nga residente nga naga higda sa lobby sang building nga maluya kag naga kuriit sa kasakit kag naga kurog ang duwa ka kamot.
Gilayon nga nangayo sang assistance ang residente kag dali dali nga gindala sang nagresponde nga paramedics ang pinay sa Tan Tock Seng Hospital kon sa diin nakit-an sang attending physician nga fractured ang iya tuo nga ti-il kag nakaangkon man ini sang mga bagras sa liog kag butkon.
Subong yara na sa estable nga kondisyon ang pinay kag naga pasalamat gid ini nga nakaluwas apang wala pa natul-id ang rason kon ngaa naglumpat ini sa building.
Ginapasuni naman sang pila ka abyan sang pinay nga posible ma terminate sang iya employer ang kontrata sang pinay bangud sa hitabo.
Padayon pa ang imbistigasyon sang police sa insidente.
Samtang, napalab-ot naman sa embahada sang Pilipinas sa Singapore ang kahimtangan sang pinay kag ginahulat nalang ang pagpapauli sa iya para sa padayon nga pahuway kag pagbulong.
