Report ni: Tita Jen Palomo Debaja
Ginpasalig sang Department of Foreign Affairs (DFA) ang pamilya sang Pinay nga ginpatay sang mister sa Sweden nga paga tutukan sang embahada sang Pilipinas ang kaso agud matagaan ini sang hustiya.
Ginkilala ang Pinay kay Mailyn Conde Sinambong, 28 anyos nga taga Cebu City kag naka pamana sang isa ka Swedish Actor.
Nahibaluan nga ginpatay ang pinay sang Mister sini nga si Steve Aron Bakre Aalam paagi sa pagkastigo tubtob nadulaan sang kabuhi.
Sa pahayag ni DFA Sec. Alan Peter Cayetano, naga coordinate na ang DFA sa pamilya sang Pinay kag naestorya na nila ang iloy nga si Mrs. Maria Montano.
Ginsiguro man ni Cayetano nga himuon sang gobyerno ang tanan agud mahatag ang bulig nga kinahanglan sang pamilya ni Mailyn ilabi na ang pag papauli sang bangkay sini sa Cebu.
Asisteran man sang DFA ang pamilya ni Mailyn agud maangkon sini ang hustiya.
Yara na sa kostudiya sang Sweden Police ang mister ni Mailyn kag naga pangatubang ini sang kaso nga murder.
