Davao City – Kumpiyansa ang Commission on Higher Education (CHEd) nga mas ‘highly competitive’ na ang mga estudyante nga mu-gradwar gikan sa lahi-lahi nga mga tulonghaan diha sa pagpang-apply unya og trabaho.
Dili na mabentahan ang mga gradwado sa mga unibersidad ug sa mga kolehiyo sa nasud ug kaya na nila muapas sa standard-pangkalibutanon ug tugbangan ang mga langyaw diha sa trabaho.
Sumala ni educator ug kanhi CHEd-XI Director Dr. Raul Alvarez nga walay hunong ang ilang buhatan sa pag-improbar sa mga palisiya aron mahimong de-kalidad ang mga curriculum sa mga universities ug colleges sa nasud.
Kampante si Alvarez nga ang mga curriculum sa mga tulonghaan sa Pilipinas nasubay sa international standard ug timaan niini mao ang pagdagsa sa mga langyaw nga nagtungha dinhi sa nasud.
Kung buot isipon, mas dali pa gani madawat sa mga kumpanya sa lokal ug langyaw ang mga Pilipino kay sa mga langyaw nga gradwado sa mga tulonghaan sa ilang mga nasud, dugang ni Alvarez.
Gani, mas kuyaw pa ang mga Pilipino itandi sa mga langyaw kay hasa sa pa sa pagsulti og English ug ingon man sa natad sa igong kahibalo busa in demand sa trabaho sa ubang kanasuran ang mga Pilipino.
Gibutyag pa ni Alvarez nga mas naningkamot pa ang mga eskwelahan sa nasud karon aron makasulod sa listahan sa kuyaw nga mga tulonghaan sa kalibutan nga nagmugna og de-kalidad nga mga gradwado.
Sa pikas bahin, gibutyag ni Alvarez nga kabahin na sa ilang palisiya ang pagtugot sa mga estudyante nga maka-final exam sanglit dili man gihapon ma-release ang grado kung dili makabayad sa mga tulonghaan.
Hinoon, gipasidan-an sa opisyal ang mga eskwelahan nga tugtang maka-final exam ug dili ipiton ang mga estudyante nga dili pa makabayad sa obligasyon sa bayrunon gumikan intawon sa kawad-on ug kalisud.
RadyoMaN Joel Viray
