ILOILO – Kumpirmado nga Pinoy ang nationality sang tul-an nga nasapwan sa isa ka septic tank sa Gyeonggi Province sa South Korea.
Sa report sang Yonhap News, ginconfirmar sang otoridad nga bangkay sang Pinoy ang nakit-an sa diin duha ka tuig na ini nga nadula gikan sa kaiping nga factory nga iya gina obrahan.
Suno sa Hwasung police, posible nagatrabaho sa factory ang biktima nga Pinoy.
Ginabanta early 30’s ang edad sang biktima nga may record sa visa sang August 2014 kag nadula na lang sang January 2016.
Angut sini, padayon nga gina-imbestigahan sang mga otoridad sa South Korea ang nasambit nga kaso kon sa diin tatlo ka mga suspek ang ginatudlo naghimo sang krimen.
Luyag man makig-angut sang South Korean authorities sa pamilya sang biktima diri sa Pilipinas agud makuhaan sang genes para sa nagakaigo nga identification.
Sa karun, gina-imbestigahan na sang OWWA kag Philippine Embassy sa Korea ang insidente.
Photo via Yonhap News
