Pagadian City – Duha ang patay lakip ang dyes anyos nga bata ug laing duha ang nasamdan sa nahitabo nga pagpamusil dihang dapita sa New Agora atubangan sa Santa Lucia National High School sa Barangay Sta. Lucia ning syudad sa Pagadian alas 7:45 niadtong nakalabay nga gabii.
Giila sa direktor sa Police Regional Office 9 nga si Police Brigadier Gen. Emmanuel Luis Licup, ang biktima nga si Noel Carbonillas, 40 anyos, lumulupyo sa maong lugar nga nahiagom og upat samad pinusilan sa lain-laing parte sa lawas nga karon gapaalim sa ospital.
Giila usab ang lain pang biktima nga si Mario Binghay, lumulupyo sa Brgy. Banale, ning syudad nga nakabaton og pinusilan sa iyang dughan nga miresulta sa hinanali niini nga kamatayon.
Sa inisyal nga report nasayran nga pipila ka minutos dihang niabot sa lugar ang biktimang si Binghay nga sakay sa motorsiklo nakabati sila og buto sa armas nga daw nagpinusilay ug nakita nalang nila ang biktima nga nagbuy-od na sa kalsada.
Sa dugang nga imbestigasyon nasuta nga napagan sa pinusilay ang 10 anyos nga batang lalaki nga nailang si Jhon Kenneth Apolo residente sa Purok Kahayag, Dumagoc ug Benjamin Amparado, 65 anyos, driver ug lumulupyo sa Upper Lumboy, Tuburan, Pagadian.
Nasayran nga samtang gimaneho ni Amparado ang pasaheroang van sakay ang menor de edad naigo sila sa saag nga bala nga gikamatay sa bata ug gikasamad ni Amparado.
Nahipos sa dapit nahitabuan ang pito ka basiyo sa calibre 45 nga pistola ug tulo ka ihap sa basiyo sa bala sa shotgun.
Gisundan na sa Pagadian City Police Station ang maong panghitabo pinaagi sa paglusad sa makuti nga imbestigasyon.
