Bisan paman kon jauy tagpagawas sa kalihim sa Department of Education na utro isuspendi an mga kalihokan na partisiparan o atenderan nan mga tinun-an sa Dep Ed tungod sa pagsaka nan kaso sa Corona Virus Disease o COVID 19 sa Pilipinas,dajon gihapon an paghiabot sa Siargao Island sa mga Officiating Officials sanan delegado sajo kagaina buntag didto sa lungsod nan Dapa. Sa pagkumpirmar sa opisina ni Gobernador Francisco Matugas pinaagi na sa tigpamaba, Roberto Parada,na plastado na gajud an tanan sa ipahigajon kuman na semana sa Caraga Regional Athletic Meet didto sa Dapa,SDN. gani gikan pa sa milabay na semana nakaabot na an mga opisyales sa nagkalain laing delegasyon sanan bana-bana tres mil an mga delegado an moabot kuman na adlaw gikan sa Surigao City ,SDN delegation sanan Agusan del Sur.Nahibaw-an isab sa RMN Surigao na gipaabot pa ni Gov. Francisco Matugas kuman na adlaw an tubag sa ija hangyo ngadto kay Sec.Leonor Briones na ikonsidera an pagdajon sa amu na kalihukan tungod kay nakaabot naman an arang na partisipante didto sa Siargao Island,labina kay nauna nang tagdajon gihapon an National School Press Conference didto sa Tuguegarao tungod kay nakaabot na isab an mga partisipante.Hugot isab na tagpatuman sa mga otoridad an pagmonitor sa kahimtang sa panglawas nan mga partisipante lakip na an ila seguridad. (This is a developing story)
