Pipila ka mga lugar sa Davao City, natalang hotspot areas sa dengue

Davao City – Ginatutukan karon sa City Health Office ang pipila ka mga lugar sa Davao City human namatikdan nga diri nga mga dapit sagad nagagikan ang mga kaso sa dengue nga natala gikan Enero hangtod Agosto ning kasamtangang tuig.

Sa interview ni RadyoMan Renz Barbarona atol sa Serbisyong Straight to the Point kang CHO spokesperson Daryl Guevara, ginganlan niya ang mga lugar nga maoy mga dengue hotspot areas sama sa Bucana, Talomo Proper, Catalunan Grande, Catalunan Pequeno, Bago Gallera, Matina Crossing, Buhangin Proper, Leon Garcia, Sasa, Panacan, Tibungco, Ilang, Bunawan, Lizada, Tacunan, Baguio Proper, Sirawan, Tugbok Proper, Toril Poblacion, Los Amigos, Sto.Nino, Calinan Proper, Mintal ug Malagos.

Panghinaut sa CHO nga makig unong kanila ang publiko nga batukan ang dengue aron kini dili mahimong epidemya nga mas daghan pang mabiktima.

“Among panawagan sa tanan nga ato jud ning paningkamutan. Kung mahimo, sa atong tanan Dabawenyos dili lang sa mga school, ato mani siyang syudad, tabangan nato atong komunidad ,” matud ni Guevara.

Dugang pahinumdom sab niya nga bisan sa mga ginagmay nga lakang, kita makatabang nga malikayan ang hulga nga dala sa dengue sama sa pagbuhat sa 5s o ang search and destroy, seek early consultation, self-protection, support fogging in outbreak areas, ug sustain hydration.

RadyoMaN Ivy Parido