Pipila ka motorista supak nga himoong legal ang pagpamasahero sa single motorcycle

Davao City – Kinahanglan pa og dugang pagtuon ang lakang nga himoong legal ang pagpamasahero sa mga single motorcycle tungod hasol usab kini og dugang gasto sa mga nanag-iya og motorsiklo, kini ang sagad reaksyon sa mga driver sa Davao City.

Sa interbyu sa DXDC RMN Davao kang Jong Jong Abueme, isip driver pabor siya nga himoong legal apan kinahanglang i-pailawom og seminar ang mga motorcycle driver aron pagseguro nga malikay sa disgrasya diin sagad malambigit sa insidente sa kadalanan ang nagmaneho og single nga motorsiklo.

Segun ni Abueme, kung himoong legal ang pagpamasada, kinahanglan usab ang driver insakto sa kahibalo sa balaud sa trapiko aron luwas ang mga pasahero.

Supak usab si Demie Bocao nga himoong legal ang pagpamasahero tungod mabutang sa delikado ang mga pasahero diin sagad malambigit sa krimen o gigamit sa mga kriminal ang single nga mga motor sama sa pagpanghold up ug uban pa.

“Sa akoa dili ko uyon ana kay ngano? Single mana nga motor diha gyud makapabor ang mga hold upper. Moabot ang panahon nga mosakay ang target ug masundan, looy ang tag-iya sa motorcycle madamay,” sulti Bocao.

RadyoMaN Don Pulayao