Pipila ka residente sa Mati, wala gihapon gitugtan nga mubalik sa ilang mga balay

Davao City – Nagpabilin gihapon sa evacuation centers ang pipila ka residente sa Purok Colilisi, Barangay Tagabakid, Mati City, Davao Oriental tungod sa risgo sa mga pag-ulan.

Sa interview sa DXDC RMN Davao kang Jonathan Dolotina, personahe sa Mati City Disaster Risk Reduction and Management Office (CDRRMO), iyahang gibutyag nga anaa sa 63 houses o 73 families gikan sa Barangay Tagabakid ang temporaryo karong anaa sa simbahan ug eskwelahan.

Matud ni Dolotina nga sa sagunson nga mga pag-ulan duna mga area nga nag-landslide sama sa pagkaguba sa dalan sa naasoy nga barangay rason nga temporaryo pang kini dili maagian sa mga motorista.

“Wala pa mamalik (ang mga residente) kay delikado pa man gud, sige’g ulan. Unya (naay) advice pud nga dili gyud sila pabalikon. Karon nga ni-landslide naman hinuon. Samot na nga dili gyud sila kabalik,” saysay ni Dolotina.

Kanunay nga gialerto ang publiko sa dagan sa panahon ug hugot nga makig-alayon sa Barangay DRRMO panahon sa emerhensiya aron malikayan ang unsa mang insidente.

RadyoMaN Kirby Manzon