Pipila ka rice retailers, wala pa nakadawat og ayuda

Davao City – Sa sunod bulan pa madawat sa pipila ka rice retailers ang ayuda nga itunol gikan sa Department of Social Welfare and Development (DSWD) alang niadtong apektado sa gipatumang price ceiling tungod sa pagtaa sa presyo sa bugas.

Sa pakighinabi sa DXDC RMN Davao kang John Rey Alimasag, rice retailer sa Panabo City, Davao del Norte, iyang gisulti nga sa tunga-tunga o katapusan sa Oktubre 2023 ilang madawat ang ayuda. Wala pa usab silay kahibalo kung pila ang kantidad sa maong financial assistance.

Matud ni Alimasag, dako na og tabang ang maong ayuda aron mabawi nila ang ilang lugi tungod sa ilang pagpatuman sa price ceiling subay sa Executive Order (EO) 39, diin P41 per kilo alang sa regular milled rice ug P45 per kilo alang sa well-milled rice.

“Unta ma-equate gyud nila tong (lugi). Unta makahatag sila’g ayuda, dako-dako gyud unta kay dako pud baya among lugi ato. Puhon puhon og kaluy-an og makaabot ba gyud,” sulti ni Alimasag.

Samtang, gianunsyo usab sa Office of the President nga karong semana (September 25-29, 2023) ang schedule sa pag-distribute sa cash assistance sa mga sari-sari store owner nga apektado usab sa price cap, diin ang Department of Trade and Industry (DTI) ang mag-identipika kung kinsa ang kwalipikadong benepisyaryo. | RadyoMaN Kirby Manzon