Pipila ka vendor dili satisfied sa agi ni Mayor Baste

Davao City – Dili satisfied sa usa ka tuig nga performance ni Davao City Mayor Sebastian ‘Baste’ Duterte, ang pipila ka vendors nga Dabawenyo.

Wala matagbaw sa usa ka tuig nga agi ni Mayor Baste, ang usa ka vendor nga si Ricky Calderon nga taga-Matina, syudad sa Davao.

Gipadayag ni Ricky, layo ra kaayo si Mayor Baste sa iyang amahan nga si kanhi Pangulong Rodrigo Duterte ug Vice President Inday Sarah Duterte, kinsa pareho nahimong Mayor sa dakbayan, kung ang hisgotan ang kahusay ug kalinaw.

Segun ni Ricky, sukad si Baste ang nahimong amahan sa dakbayan, mibalik ang mga krimen ug mga ngilngig nga panghitabo sama sa Bragas Rape Slay Case ug pagpatay sa duha ka pulis sa Calinan Police Station, human gitigbas sa usa ka lumad sa tribong Matigsalog nga nahitabo sa Purok 4, Barangay Lacson sa miaging mga adlaw.

Busa, 7 ang gihatag ni Ricky Calderon nga grado kang Mayor Baste, kay alang kaniya dili na luwas ang dakbayan alang sa mga dabawenyo, gumikan sa mga panghitabo karon sa syudad sa Davao.

RadyoMaN Joel Viray