Indi mag-upod sa transport strike sang PISTON National ang PISTON-Panay kag iban nga transport groups sa Western Visayas sa Disyembre 4 kag 5.
Ini ang ginpahayag ni Mr. Edgar Salarda, Presidente sang PISTON-Panay kasunod sang ila nga ginhiwat nga transport forum kahapon nga adlaw.
Suno kay Salarda nga bangud tuman ka ubol sang panahon kag kulang sang preparasyon, indi sila makaupod sa hiwaton nga transport strike nga ginkasa sang Piston-national sa Metro Manila sa maabot nga Lunes kag Martes.
Subong man, ginpahayag ni Salarda nga bilang suporta sa nasambit nga transport strike sang Piston-national, magapatigayon sang isa ka daku nga transport caravan ang sektor sang transportasyon sa siyudad kag probinsya sang Iloilo sa Lunes nga adlaw, Disyembre 4.
Magatipon ang mga magaupod sa transport caravan sa Mojon Terminal kag magalibot sa tanan nga terminal sa siyudad sang Iloilo.
Ang nasambit nga lihok kabahin sa gihapon sa mabaskog nga pagpamatuk sang sektor sang transportasyon sa ginaduso nga jeepney modernization program sang gobyerno nga pagasuguran na sa Enero 2018.
