Nagahingyo ang Piston-Panay sang pag-ilikid sang gobyerno pinaagi sa paghatag sang subsidy sa mga drivers sa tunga sang panibag-o naman nga mandu sang LTFRB nga paghatag sang 20% nga discount sa mga estudyante bisan wala sang klase.
Ginpahayag ni Edgar Salarda, Presidente sang Piston-Panay nga wala sang problema sa mga drivers ang paghatag sang discount sa mga estudyante bisan holiday kag bakasyon basta may ihatag man sa ila nga kompensasyon ang gobyerno agud matabunan ang nadula sa ila nga income.
Suno kay Salarda nga pila sa mga bulig nga puwede mahatag sang gobyerno sa mga drivers amo ang pagdula sang 12% nga VAT sa produktong petrolyo, kag pagbasura sang oil deregulation law.
Ini nga panawagan suno sa iya madugay na nila nga ginapalab-ot sa gobyerno apang nagapabilin ini nga bulang kag bungol sa ila mga palanambiton.
Angut sini, nagalaum ang Piston-Panay nga sabton sang Administrasyon ang ila mga panawagan agud indi man madehado ang mga drivers sa panibag-o nga mandu sang LTFRB.
