Pagadian City – Usa ang patay, duha ang padayong gipangita ug upat ang naluwas sa pito mga mananagat nga gipamusil didto sa lawod nga sakop sa Pangutaran, Sulu niadtong lunes sa kadlawon.
Swerte nga nakauli ug naluwas sa piligro ang upat ka mga mananagat nga sakay sa FB Cris-sar human silang gipaarakan sa wala mailing armadong kalalakin-an nga sakay sa duha ka pumpboat nga kolor yellow alas 12:00 sa kadlawon.
Apan patay nang nahidangat sa syudad kagahpon sa hapon ang kapitan sa panagatan nga si Crispin Manhuyod Cuer Sr., nga residente sa Brgy. Dumagoc ning syudad.
Padayon ang rescue operation sa Philippine Coastguard Guard (PCG) Sulu sa duha ka mga missing nga sila si Nicanor Cuer ug Joseph Delmiquez.
Sa interview sa RMN-Pagadian kang Lt. Commander Paul Ryan Gonzales sa PCG-Zambaoanga del Sur ang maong panagatan rehistrado sa pangalan ni Rosario Calisang Sr., taga-Dumagoc ning dakbayan.
Gidugang ni Gonzales nga paspas kayo ang hitabo ug gani milungtad lang sa usa ka minutos ang pagpa-arak ug daling nisibat ang mga suspek.
Blangko pa ang PCG sa motibo sa maong pagpangrapido ug nagpadayon ang rescue operation sa duha ka mananagat nga missing pa hangtud niining higayona.
