Ginkumpirmar ni Jail Supt. John Montero, ang bag-o nga Jail Warden sang Iloilo District Jail sa barangay Nanga, Pototan nga plano sang pila ka mga bilanggo nga maglunsar sang jail break.
Ginpahayag ni Monterno nga base sa iya nabaton nga report, plano sang mga priso nga magpalagyo bangud sa iya hugot nga pagpatuman sang seguridad sa IDJ kon sa diin indi na makahulag ang mga priso ilabi na ang mga nagahimo sa gihapon sang illegal nga buluhaton sa sulod sang bilangguan.
Indi pa matumod ni Monterno kon sin-o ang nagapamuno sa plano nga jailbreak apang nagapati siya nga posible ang mga high value targets nga nakabilanggo na sa BJMP bangud ang mga ini ang labi nga apektado sa hugot nga seguridad nga iya ginpatuman.
Nagpungko si Supt. Montero bilang bag-o nga Warden sang IDJ sang nakaligad lamang nga Oktubre 1, 2017 kag sa halos tunga sa bulan pa lamang niya sa puwesto, nagpatuman na ini sang hugot nga seguridad agud wala sang makalusot nga kontrabando sa BJMP bagay nga wala naluyagan sang mga illegalista nga mga bilanggo.
Suno kay Montero nga ini ang isa sa rason nga iya nakita nga nagplano maglunsar sang jailbreak ang mga priso agud ma-relieve siya sa puwesto.
Bangud sini, labi pa nga ginhugtan sang BJMP ang pagbantay sa bilangguan kag gin-alerto ang tanan nga jailguards agud mapunggan ang pagpalagyo sang mga priso.
