Calatrava, Negros Occidental – Patay ang isa ka planter kag driver sini matapos ginpaarakan sang luthang pasado las 6 subong nga aga sa Hacienda Rigor, Spur 8, Minapasok banwa sang Calatrava.
Nakilala ang mga biktima nga sanday Norberto ‘Bebe’ Lumayno, 67 anyos kag driver nga si Danilo Braga, 45 anyos nga pumoloyo sang Sagay City.
Sakay sa pick-up nga puti ang duha sang hinali ini nga gin-ambush sang malapit 15 ka tawo gamit ang M-14 kag M-16 armalite rifle.
Dead on the spot sanday Lumayno kag Braga bangod sa patal nga pilas sa nagkalain lain nga bahin sang ila nga lawas matapos nga tadtad sang bala ang pick-up.
Sa interview sang dyHB sa bayaw nga si Raul Baterna, land dispute ang ila ginalantaw nga rasun sa diin mga gun-for-hire ang mga naghimo sang kremin.
Gilayon naman nga nagresponde ang mga katapo sang Philippine Army kag nagpatigayon sang follow-up operation sa hitabo.
Isa ka encounter ang natabo sa Barangay Cambayubo, Calatrava sa diin nakarecover sang mga militar ang mga abandonado nga mga gamit sang mga armado nga grupo nga indi maglayo, iya sang mga katapo sang New People’s Army.
