Nagpaguwa eon it mandato si Malay Mayor Ciceron Cawaling kaangot sa pag-require sa tanan nga mga establisyemento sa isla it Boracay nga magbutang it plastic container nga basurahan sa anda nga area.
Daya hay santo sa Executive Order No. 026 nga pirmado ni Cawaling ag ging base man sa Republic Act No. 9003 nga mas kilaea sa tawag nga Ecological Solid Waste Management Act of 2000 nga kung sa siin gina rekwesta ro tanan nga LGU nga magbutang kara.
Tuyo ko raya nga nasambit nga Executive Order nga maeowas ro tanan sa sakit nga halin sa basura ag para nga mapanami pagid ro Boracay pamaagi sa maayos nga pagpilak ag pag-segregate it mga basura eabi eon sa beach area kung siin maabong mga turista.
Samtang nakabutang man sa EO nga dapat ro mga nasambit nga basurahan hay may kapasidad nga mapilan it 5 hasta 10 kilo nga basura.
Mag-eowas kara gina kinahang-ean man nga ibutang sa mga basurahan do label o ro pangaean it establisyemento agod madali ma-identify kung tama o saea ro pag-separar it mga basura.
Madumduman nga naging mabahoe ro problema it isla pag-abot sa mga basura ko mga nagtaliwan nga buean rason nga nagbueoligan gid ro mga natungdan eabi eon do LGU nga mausoyan daya it solusyon.
