Sa dili madugay pagasugdan na ang “pag-renovate” sa Plaza Magsaysay kini ang nasayran gikan sa buhatan sa City Planning and Development, dinhi sa dakbayan sa Dipolog.
Base na usab sa atong makita ning kasamtangan temporaryo nang gipensahan ang palibot sa Plaza Magsaysay, aron ipa-ilawom na sa pag-trabaho karong umaabot nga mga adlaw.
Sumala pa nga ang pagtrabaho niini o Renovation sa nahisgutan nga plaza molungtad kini ngadto sa 300 calendar days, sigun sa program of works gisugdan niadtong Abril 27 hangtud na sa Pebrero 21, sa sunod tuig 2019.
Temporaryong pagsiradohan una ang Plaza Magsaysay ngadto sa publiko aron paghatag ug agi-anan alang sa pagtrabaho niini, gitugotan kini pinaagi sa usa ka ordinansa nga aprobahan sa Sangguniang Panlungsod ning dakbayan.
Ang maong proyekto aduna kini pondo nga P30 milyones ka pesos.
Tumong sa liderato ning dakbayan nga mapa-usbaw ang kasamtangang kahimtang sa Plaza Magsaysay nga taud-taod nang gihimo ngadto sa usa ka maanindot nga panagway niini duyog na sa modernong panahon.
Dugang gipaklaro karon sa namunoan ning dakbayan nga ang pag-renovate sa plaza, ang panagway lamang niini ang paga-usbon, diin ipabilin ra ang kiosko ug Rizal Park, isip mga makasaysayanong landmarks dinhi sa dakbayan.
Lauman usab inig kahuman niiini nga proyekto daghan nga mga bisita ang manuroy tungod na unya sa kaanindot sa panagway sa plaza nga moderno na.(CIO)
