Davao City – Gisugyot karon sa Parent Mobilization Action Group (PMAG) ang kalidad nga panahon sa bonding sa pamilya aron malikay ang mga kabataan gikan sa peligro sa gawas sa ilang panimalay.
Sumala ni PMAG President Febe Matthew, dakong ayuda ang taas nga oras sa family bonding aron hilaon ang ilang mga anak gikan sa pag-uban sa barkada nga posibleng magbutang kanila sa peligro.
Matud ni Matthew, maglig-on lang ang relasyon sulod sa panimalay kung regular ginahimo ang family bonding nga maoy sikreto sa himsog ug kusog sa pamilyang Pilipino.
Pipila ka istratehiya ang rekumendar sa pangulo sa hut-ong sa mga ginikanan sa siyudad sa Dabaw sama sa movie marathon nga kinaham sa tanan.
Apan sigurohon lang nga ang movie tan-awon kadtong ganahan sa mga bata aron muapil gayod sa tapok sa aktibidad sa pamilya hilabi na panahon sa kagabhion.
Dili baliwalaon sa mga ginikanan ang ginikanahanglang atensiyon sa ilang mga anak aron dili sila musan-dig sa barkada nga magdala kanila sa dalan kansang piligro nagpaabot sa unahan.
Gidugang pa ni PMAG President Febe Matthew, ang mga ginikanan kansang mapasagaron sa kahimtang sa ilang mga kabataan ug walay pakialam bisan og nabutang na sa kuyaw ang ilang mga anak angay hampakan sa bug-at nga silot aron matagam.
RadyoMaN Joel Viray
