PMHA Davao: Inflation rate, nakahatag og mental health crisis sa katawhan

Davao City – Tungod sa padayong pagtaas sa presyo sa palaliton, nakita sa Philippine Mental Health Association (PMHA) Davao nga daghan na ang wala nakasabot kung paunsa nila i-budget ang ilang panudlanan nga maigo sa ilang pamilya hinungdan nga maapektuhan na ang ilang panghunahuna.

Sa interview sa DXDC RMN Davao kang PMHA Davao Chapter Executive Manager, Teofilo Limikid atol sa Serbisyong Straight to the Point kauban si RadyoMan Renz Barbarona, iyang gibutyag nga usa ka dakong contributor ang inflation rate sa mental health crisis sa katawhan ilabi na niadtong vulnerable na daan.

Dugang niya nga mahitabo ang economic stress nga posibleng muabot sa depression kung aduna na’y kakulangon sa resources ang usa ka indibidwal ug dili na makaapas pa sa mga demand karon.

Matud ni Limikid nga angayang tun-an samtang sayo pa ang Financial Literacy sa matag pamilya ug komunidad aron nga kung aduna’y kalisod nga muabot, kabalo na kung paunsa kani dawaton ug dumalaon.

Pahinumdom kanunay sa PMHA nga kinahanganlan og suporta ang matag usa nga pwedeng masampit sa panahon sa panginahanglan ug sila nanghinaut nga makakat-on ang tanan sa pagduol ug pagpapangayo og tabang sa mga mental health professionals.

RadyoMan Ivy Parido