Sa interbyu sa DXDC kang Marlon Bautista, gadula og online game ang iyahang 45 anyos nga si Mark Anthony Bautista samtang gapaabot og pasahero sa iyahang gidraybang trisikad dihang kalit lang niabot ang mga pulis og gipusil kini sa makadaghang higayon.
Sumala niini tanom lang ang mga kwarta ug armas nga nakuha sa iyahang igsuon.
“Gipusil gyod og tuyo kay dili man sad nato masulting nisukol kay wala man toy baril, wala poy kwarta to, unya pagkita nako didto libo-libo naman ang kwarta… muabot sa ilaha gaba ra,” matud niini.
Gibutyag ni PLTCOL Ronald Lao, Sta. Ana Police Station Commander, nga lehitimo ang operasyon batok sa suspek apan aron mawala ang duda abli sila kung mupasang-at man og complaint ang kabanay.
Gawas sa pagpamaligya’g shabu, matud ni Lao nalambigit na ang suspek kaniadto sa pagbaligya’g kinawat nga mga butang.
“Nahitabo broad daylight mana, naa may mga witnesses willing ug open mi nga muatubang sa ilaha kung naay complaint. Automatic man sad nga naay moto propio ang CIAS,” matud ni Lao.
Giingong nisukol patay ang suspek niadtong Lunes Agosto 16 sa joint buybust operation sa Special Operating Group/ City Drug Enforcement Unit (SOG/CDEU)DCPO ug Sta. Ana police sa Sitio San Roque, Gotamco, Brgy. Leon Garcia Agdao ning dakbayan.
RadyoMaN Aimee Guinita
