Sa interbyu sa DXDC RMN Davao kang Police Lieutenant Colonel Jess Anthony Maghirang, Chief of Police sa Nabunturan MPS, gibutyag niini nga nag-inventory niadtong higayona ang cashier sa establisemento kauban ang lain pang personahe, sa dihang kalit misulod ang lima ka armadong indibidwal ug gitionan ang mga biktima, dayon tangag sa kwarta ug pipila ka gamit, sakay sa duha ka motor ug usa ka Bao-bao.
Matud ni Maghirang, ang tulo ka identified suspects aduna nay kanhi record robbery, ug ang uban kanhi na napriso ug nakapyansa.
Samtang, wala usab giwala sa kapulisan ang anggulo nga ‘inside job’ ang insidente, human nasayrang miuli kadali sa ilang balay ang gwardya sa establisemento tungod matud pa sa gibating nerbyos sa asawa human sa linog. Samtang, nakita usab sa closed-circuit television (CCTV) footage nga kampante lamang kaayo ang mga tulisan nga misulod sa establisemento.
“Although, naa na ‘mi identified gyud nga suspects, pero gitan-aw gyud namo kung naa ba sya inside job nga angle kay naa syay mga indicator gyud kay dali ra kaayo ang lihok ba (sa mga tulisan),” sulti ni Maghirang.
Sa pagkakaron, ginahulat pa kung pila ang ideklarang kantidad sa establisemento nga maoy nakuha sa mga tulisan nga padayon karong gikukod sa awtoridad.
RadyoMaN Kirby Manzon
